जालना – जिल्हा परिषद अंतर्गत उशिरा येणार्‍या अधिकारी /कर्मचारी यांची जिल्हा परिषदेच्या मुख्य कार्यकारी अधिकारी वर्षा मीना यांनी आज अचानक जिल्हा परिषदेत तपासणी केली असता २५ कर्मचारी उशिरा आलेले आढळून आले. कडक शिस्तीच्या अधिकारी अशी ओळख असलेल्या जालना जिल्हा परिषदेच्या मुख्य कार्यकारी अधिकारी वर्षा मीना यांनी जालना येथील पदभार घेतल्या नंतर जिल्हा परिषद आणि पंचायत समिती अंतर्गत कार्यरत असलेल्या अधिकारी आणि कर्मचारी यांनी वेळेत कार्यालयात यावे या साठी आज अचानक तपासणी मोहीम हाती घेतली असता २५ कर्मचारी उशिरा आलेले आढळून आले.
सर्व सामान्य जनतेची कामे तातडीने मार्गी लावण्यासाठी वर्षा मीना यांनी पाऊल उचलले असून त्याचाच एक भाग म्हणून कार्यालयीन वेळेत हजर न होणाऱ्या कर्मचाऱ्यांनी वेळेत कार्यालयात उपस्थित राहावे या उद्देशाने मुख्य कार्यकारी अधिकारी वर्षा मीना यांनी आज सोमवारी सकाळी कार्यालयात दाखल झाल्यानंतर जिल्हा परिषद कार्यालयाच्या इमारतीत प्रवेश करण्यासाठी असलेले सर्व द्वार १०.३० वाजता बंद करण्याचे आदेश देऊन केवळ त्यांच्या दालनाकडून असलेले द्वार उघडे ठेवत अर्धा तास स्वतः वर्षा मीना यांनी दालना बाहेर खुर्चीवर ठाण मांडून येणाऱ्या लेट लतिफ कर्मचाऱ्यांना सक्त ताकीद दिली. आजच्या या कार्यवाहीत उशिरा येणारे २५ कर्मचारी त्यांच्या तावडीत सापडले.
यात यांत्रिकि विभागतील १, बांधकाम विभागातील २,सिंचन विभागातील २, वित्त विभागातील १, पंचायत विभागातील१, महिला व बाल कल्याण विभागातील ३, एसबीएम मधील १, कृषि विभागातील २, पशूसंवर्धन विभागातील २, शिक्षण विभाग ४, आरोग्य विभाग १,पाणी पुरवठा २,आपले सरकार २,समाज कल्याण विभागातील एका कर्मचाऱ्याचा समावेश असून अचानक झालेल्या या कार्यवाही मुळे जिल्हा परिषद परिसरात खळबळ उडाली असून आगामी कालावधी मध्ये अशाच प्रकारे अचानक तपासणी करून उशिरा येणार्‍या अधिकारी कर्मचारी यांच्यावर कार्यालयीन कार्यवाही केली जाईल असा इशाराही मुख्य कार्यकारी अधिकारी वर्षा मीना यांनी दिला आहे. त्यामुळे भविष्यकाळात जिल्हा परिषदेत ऑफिस वेळात आलेले कर्मचारी अधिकारी दिसतील असे चित्र पाहावयास मिळेल यात शंका नाही.
