पुणे – अहमदनगर महामार्ग दिवसेंदिवस मृत्युचा सापळा बनत चालला असल्याचे पहायला मिळत आहे. त्यातच पुण्यातील कोरेगाव भीमा येथील वाडा पुनर्वसन येथे स्विफ्ट डिझायर व दुचाकी मध्ये झालेल्या अपघातात एका युवकाचा मृत्यू झाला. त्यात त्याला वैद्यकीय मदत देण्यासाठी येणाऱ्या रुग्णवाहिकेची दुचाकीला धडक बसल्याने दुसऱ्या दुचाकी चालकाचा देखील मृत्यू झाल्याची घटना समोर आली आहे. या अपघातात रुग्णवाहिका चालक व त्याच्या शेजारील आणखी एक जखमी झाला आहे. त्यांना जवळील रुग्णालयात उपचारासाठी दाखल करण्यात आलं आहे.
या झालेल्या अपघातात महेश गव्हाणे या तरुणाचा जागेवरच मृत्यू झाला असून महेश गव्हाणे यांच्या अपघाताची माहिती मिळताच त्यांच्या मदतीसाठी येणाऱ्या रुग्णवाहिकेची सणसवाडी गावच्या हद्दीत कल्पेश वनज काटयाजवळ रुग्णवाहिकेच्या चालकाचे वैभव गजानन डोईफोडे यांच्या गाडीवरील नियंत्रण सुटल्याने श्रीकांत सुर्यकांत उबाळे यांच्या मोटारसायकलला धडक बसल्याने अपघातामध्ये दुसरा व्यक्ती मयत झाला झाला आहे. रुग्णवाहिका चालकासह त्याच्या शेजारी बसलेले अक्षय रविंद्र बनसोडे हे या अपघातात जखमी झाले आहेत. या दुहेरी अपघाताने एकच खळबळ उडाली होती.
पुणे – नगर महामार्गावर अपघाताचे प्रमाण वाढत चालले असून यात तरुणाचे मृत्यूचे प्रमाण अधिक असल्याचे समोर येत आहे. या घटनेने काही काळ वाहतूक कोंडी झाली होती. पोलिसांनी घटना स्थली दाखल होत वाहतूक सुरळीत केली आहे. या विचित्र अपघाताने नागरिक हळहळ व्यक्त करत आहेत. मृतांच्या नातेवाइकांना मोठा धक्का बसला आहे.
