अमरावती – दिनांक ७ डिसेंबर बुधवारी सायंकाळी ७ वाजताच्या दरम्यान नांदगाव पेठ येथील उड्डाणपूलावर एसटी बसचा अपघात होऊन बस उड्डाणपूलाच्या कठड्यावर लटकली होती. यामध्ये चालक वाहक गंभीर जखमी होऊन त्यांना उपचारार्थ जिल्हा सामान्य रुग्णालयात दाखल करण्यात आले मात्र यामधील गंभीर जखमी असलेल्या वाहकाचा उपचारादरम्यान रात्रीच मृत्यू झाल्याने सर्वत्र हळहळ व्यक्त होत आहे. बसचे स्टेअरिंग जाम झाल्याने हा अपघात झाल्याचे बोलले जात आहे.
नागपूर आगाराची औरंगाबाद नागपूर बस क्र. एम.एच. ४० वाय ५८२८ ही अमरावती बसस्थानक येथून बुधवारी सायंकाळी साडेसहा वाजताच्या दरम्यान नागपूर जायला निघाली ही बस सात वाजताच्या दरम्यान नांदगाव पेठ उड्डाणपूलावर पोहचताच बस चे स्टेअरिंग जाम झाल्याने बस चा अपघात होऊन बस कठड्यावर अडकली. मात्र पुढे बसलेले वाहक गजानन वाकपांजर वय ४१ (थिलोरी दर्यापूर) हे बसमधून थेट खाली पडल्याने त्यांच्या डोक्याला गंभीर दुखापत झाली. त्यांना तातडीने उपचारासाठी जिल्हा सामान्य रुग्णालयात दाखल करण्यात आले मात्र उपचारादरम्यान त्यांची प्राणज्योत मालवली. तर बस चालक केशव धोटे हे सुद्धा जखमी आहेत.
३२ प्रवासी घेऊन जाणारी ही एसटी बस अपघातानंतर उड्डाणपूलावर लटकली होती.यामध्ये काही प्रवासी देखील किरकोळ जखमी आहेत मात्र मोठी दुर्घटना होण्यापासून टळली. ही बस खाली कोसळली असती तर क्षणात होत्याचे नव्हते झाले असते मात्र दैव बलवत्तर म्हणून प्रवासी सुखरूप आहेत मात्र वाहक गजानन वाकपांजर हे खाली पडल्याने त्यांना गंभीर दुखापत झाली आणि उपचारादरम्यान त्यांची प्राणज्योत मालवली. घटनेची पोलिसांनी नोंद घेतली असून दोषी चालकावर कार्यवाही करण्याची प्रक्रिया सुरू आहे.
