सोलापूर – जिल्हा परिषदेचे आरोग्य अधिकारी डॉ शीतल जाधव यांना आरोग्य मंत्री तानाजी सावंत यांनी विधानसभेच्या अधिवेशनात तडकाफडकी निलंबित केले. आरोग्य अधिकाऱ्यांच्या निलंबनामागे मुख्यमंत्री एकनाथ शिंदे यांचे समर्थक मव सोलापूर येथील शिंदे गटाचे जिल्हा प्रमुख मनीष काळजे यांचा हात असल्याचा गंभीर आरोप यावेळी सोलापूर जिल्हा परिषद आरोग्य खात्यातील कर्मचाऱ्यांनी केला आहे. आरोग्य खात्यातील कर्मचारी हे अत्यंत दबावाखाली काम करत असल्याची माहिती समोर आली आहे. आम्ही मुख्यमंत्री व आरोग्य मंत्री तानाजी सावंत यांचे कट्टर समर्थक आहोत, अशी धमकी देत, आमच्यावर दबाव आणण्याचा प्रयत्न केला जात असल्याच गंभीर आरोप यावेळी केला आहे. मुख्यमंत्री एकनाथ शिंदे व आरोग्य मंत्री तानाजी सावंत यांचे कार्यकर्ते व पदाधिकारी असे केल्याने आम्ही काम कसे करावे असा सवाल आरोग्य कर्मचाऱ्यांनी जिल्हा परिषद मुख्य कार्यकारी अधिकारी दिलीप स्वामी यांकडे केला आहे. सोलापूरच्या आरोग्य खात्यातील प्रशासकीय कामकाजात राजकिय नेत्यांचा, पुढाऱ्याचा, व कार्यकर्त्यांचा हस्तक्षेप थांबवावा अशी मागणी केली आहे.
आरोग्य अधिकाऱ्यांना निलंबित केल्यानंतर शिंदे गटाच्या जिल्हा प्रमुखांची तक्रार
आरोग्य अधिकारी डॉ शीतलकुमार जाधव यांना आरोग्य मंत्री तानाजी सावंत यांनी २६ डिसेंबर रोजी विधानसभेच्या अधिवेशनादरम्यान निलंबित केले आहे. २९ डिसेंबर २०२२ रोजी शिंदे गटाचे जिल्हा प्रमुख ,मनीष काळजे यांच्या सहीशिक्क्यानीशी आरोग्य मंत्र्यांना पत्र लिहिण्यात आले आहे. हे पत्र सोशल मीडियावर देखील वायरल झाल्याने मुख्यालयात काम करणाऱ्या व जिल्ह्यात इतर आरोग्य केंद्रात काम करणाऱ्या आरोग्य कर्मचाऱ्यांत भीतीचे वातावरण पसरले आहे. याबाबत प्राथमिक आरोग्य केंद्रात कार्य करणाऱ्या नर्सेसनी गुरुवारी जिल्हा परिषद मुख्य कार्यकारी अधिकारी दिलीप स्वामी यांना निवेदन देऊन विनंती केली आहे, शिंदे गटाच्या पदाधिकऱ्याचं व कार्यकर्त्यांच हे राजकीय हस्तक्षेप थांबवा. अन्यथा सामूहिक राजीनामा दिला जाईल.
प्रामाणिक काम करणाऱ्या का त्रास दिला जातोय
सोलापूर जिल्ह्यातील प्राथमिक आरोग्य केंद्रातील नर्सेसनी निवेदन देत मागणी केली आहे, प्रामाणिकपणे काम करणाऱ्या आरोग्य कर्मचाऱ्यांत भीतीचे वातावरण पसरले आहे. एका विशिष्ट दबावाखाली काम सुरू आहे. शिंदे गटाचे कार्यकर्ते व।पदाधिकारी हे आरोग्य खात्यातील मुख्यालयात किंवा प्राथमिक आरोग्य केंद्रात येतात, दहशत निर्माण करून जातात अशी माहिती ,यावेळी बोलताना ,अधिपरिचरिकांनी दिली.
