कोल्हापूर- कलामहर्षी बाबुराव पेंटर यांच्या स्मृतिदिनानिमित्त कोल्हापुरातील रंगबहार संस्थांच्या वतीने अभिवादन करण्यात आले. चित्रकार सर्जेराव निगवेकर यांनी पद्माराजे उद्यानातील पुतळ्यास पुष्पहार अर्पण केला. या प्रसंगी संजीव संकपाळ प्राचार्य अजेय दळवी विजय टिपुगडे,श्रीकांत दिग्रजकर,मनोज दरेकर, प्रा मनीपद्म हर्षवर्धन,प्रा. गजेंद्र वाघमारे,प्रा .किशोर राठोड,बबन माने,राहुल रेपे, प्रा प्रवीण वाघमारे, प्रा अभिजित कांबळे ,सुधीर पेटकर,सर्वेश देवरुखकर,सुशांत सुतार हे उपस्तित होते. या प्रसंगी कलामहर्षींच्या आठवणींचा जागर करण्यात आला.
बाबूराव पेंटर हे जरी कोल्हापूरचे असले, तरी गुरुंचे गुरू म्हणून त्यांना ओळखतात. चित्रपटसृष्टीतील पहिलेवहिले तंत्रज्ञान बाबूराव पेंटर यांनीच रूढ केले आहे. यामध्ये भारतीय कॅमेर्याने चित्रित केलेला पहिला चित्रपट सैरंध्री असो, याच चित्रपटासाठी स्त्री कलाकाराकडून स्त्री पात्राची भूमिका असो, चित्रपटांचा सुवर्णकाळ सुरू करण्याचा प्रभातच्या आधी महाराष्ट्र फिल्म कंपनीचा मान असो, निर्मिती, वेशभूषा, ट्रिकसीन असो, की प्रसिद्धीसाठी पोस्टरचा वापर असो, ही सारी तंत्रे पेंटरांनी पहिल्यांदाच चित्रपटासृष्टीत रूढ केली चित्रकार, शिल्पकार, तंत्रज्ञ, चित्रपट-निर्माते व दिग्दर्शक अश्या बहुआयामी कार्यामुळेच कलामहर्षी म्हणून ते गौरविले जात. प्रतिमा चित्रणातील कौशल्य व रंगभूमीवरील नेपथ्य. विशेषत: पडद्याची कलात्मकता या बाबतींत त्यांनी खूपच लौकिक मिळविला होता. चित्रशिल्प, आदी कलाक्षेत्नांत त्यांनी स्वाध्यायाच्या बळावरच आपली प्रगती करून घेतली होती बाबूराव पेंटर यांच्या चित्रकारितेने रसिकांना भुरळ घातली होती. अशा कालखंडाचे प्रतिनिधी म्हणून बाबूराव पेंटर यांचे कलाकर्तृत्व उदंड मानावे लागेल.
