पुणे – भाजपच्या दिवंगत नेत्या मुक्ता टिळक यांच्या निधनानंतर रिक्त झालेल्या कसबा पेठ विधानसभा मतदारसंघात २६ फेब्रुवारी रोजी पोटनिवडणूक होणार आहे. या पोटनिवडणुकीत महाविकास आघाडीतील तिन्ही पक्ष लढण्यावर ठाम आहेत. त्यामुळे पुण्यात महाविकास आघाडीत संघर्ष निर्माण होण्याचे चिन्ह आहेत. नुकतीच शिवसेना (उद्धव बाळासाहेब ठाकरे) पक्षाच्या पदाधिकाऱ्यांची एक बैठक पुण्यात पार पडली. या बैठकीत कसबा पोटनिवडणूक शिवसेनेने लढावीच असा एकमुखी सुरू उमटला.
शिवसेनेच्या संपर्क प्रमुखांच्या अध्यक्षतेखाली काल (२९ जानेवारी ) रोजी रात्री एक बैठक पार पडली, या बैठकीत कसबा पेठ विधानसभा पोटनिवडणूक शिवसेनेने लढवावी आणि उमेदवारी शहराध्यक्ष संजय मोरे यांनी द्यावी अशी मागणी पदाधिकाऱ्यांनी संपर्क प्रमुखांकडे केली आहे. हा निरोप घेऊन संपर्क प्रमुख उद्धव ठाकरे यांच्या भेटीला गेले असल्याची माहिती खात्रीलायक सूत्रांनी दिली आहे.
तर, दुसरीकडे चिंचवड पोटनिवडणूक जर काँगेस लढण्याची मागणी करत असेल तर शिवसेनेने का लढवू नये असा सूर या बैठकीत पदाधिकाऱ्यांनी आवळला आहे. त्यामुळे ही पोटनिवडणूक शिवसेना लढणारच अस पदाधिकारी म्हणत आहेत.
कसबा पेठ विधानसभा पोटनिवडणूक महाविकास आघाडीत काँग्रेस पक्षाने लढवण्याची तयारी पूर्ण केली असून काँग्रेसकडून इच्छुक असणारे रवींद्र धंगेकर यांनी महापालिकेकडे ना हरकत प्रमाणपत्र मिळवण्यासाठी अर्ज देखील केला आहे. त्यातच आता शिवसेनेने कोणत्याही परिस्थितीत कासब्याची जागा लढवण्याची तयारी दाखवल्याने महाविकास आघाडीत संघर्ष निर्माण होण्याचे चिन्ह आहेत.
दरम्यान, या मतदारसंघातूनच शिवसेनेचे माजी नगरसेवक विशाल धनवडे हे देखील इच्छुक आहेत. विशाल धनवडे यांनी २०१९ मध्ये बंडखोरी करत अपक्ष म्हणून निवडणूक लढवली होती. त्यांना १३ हजार ९८९ इतकी मतंही मिळाली होती. ते पुन्हा एकदा या मतदारसंघातून इच्छुक आहेत.
मात्र, शिवसेनेचे प्रवक्ते संजय राऊत यांनी चिंचवड मतदारसंघात शिवसेनेची ताकद अधिक असल्याचं गणित मांडत कसब्यातून नव्हे तर चिंचवडमधून शिवसेनेला उमेदवारी मिळावी, असं म्हटलं असल्याने कसब्यातील शिवसेनेचे पदाधिकारी कमालीचे अस्वस्थ झाले आहेत. त्यानंतर बैठक घेऊन पुण्यातील शिवसैनिकांनी कसब्यात निवडणूक लढण्यावर ठाम असल्याचा निरोप पक्षप्रमुखांना पाठवला आहे. यावर आता काय निर्णय होणार याकडे शिवसैनिकांचे लक्ष लागले आहे.
