सोलापूर – मोहोळ येथील एका साखर कारखान्याविरुद्ध केलेल्या तक्रारीवर कारवाई न करण्याकरिता तसेच परवाना देण्यासाठी दोन लाख रुपयांची लाच मागणी केली. लाच स्वीकारताना महाराष्ट्र प्रदूषण नियंत्रण मंडळाच्या उपप्रादेशिक अधिकाऱ्यास लाचलुचपत प्रतिबंधक विभाग पथकाने बुधवारी रात्री अटक केली आहे. अजित वसंतराव पाटील (वय ५०) असे अटक करण्यात आलेल्या उपप्रादेशिक अधिकाऱ्याचे नाव आहे. महाराष्ट्र प्रदूषण नियंत्रण मंडळाच्या वरीष्ठ उपप्रादेशिक परिवहन अधिकाऱ्यास लाच घेताना अटक झाल्याने एकच खळबळ उडाली आहे.
मोहोळ येथील एका साखर कारखान्यावर कारवाई करणार होते
तक्रारदाराने एसीबीला तक्रार देताना माहिती दिली होती, साखर कारखान्याचे डिस्टलरी युनिटचे कन्सेंट टू ऑपरेट लायसन नूतनीकरण करावयाचे होते. तसेच साखर कारखान्याकडून हवा व पाणी प्रदूषण होत असल्याबाबत कारखान्याच्या आजूबाजूच्या लोकांनी महाराष्ट्र प्रदूषण नियंत्रण मंडळ कार्यालयाकडे तक्रारी केल्या होत्या. या साखर कारखान्याचा फार्मासिटिकल युनिटचे कंसेन्टन्स टू एस्टॅब्लिश हे लायसन्स प्रस्तावित होते. ही सर्व कामे करण्यासाठी तसेच नागरिकांनी केलेल्या तक्रारीवर कारवाई न करण्यासाठी आणि दोन्ही प्रकारचे लायसन्स मिळण्यासाठीचा प्रस्ताव वरिष्ठ कार्यालयास सादर करण्यासाठी उपप्रादेशिक अधिकारी अजित पाटील यांनी दोन लाख रुपये लाचेची मागणी केली होती. प्राप्त तक्रारीनुसार एसीबीने कारवाई करत, उपप्रादेशिक अधिकारी अजितपाटील यांना दोन लाख रुपये लाच घेताना रंगेहात कारवाई केली आहे.
धुळे येथून बदलून आले होते अजित पाटील; बदलीसाठी मोठा उठाठेव केला होती
दोन लाख रुपयांच्या लाच प्रकरणी अटक झालेले महाराष्ट्र प्रदूषण महामंडळाचे उपप्रादेशिक अधिकारी अजित पाटील हे वर्षभरापूर्वी सोलापूर येथील कार्यालयात रुजू झाले होते. सोलापूर जिल्हा नको,धुळे किंवा विदर्भात बदली करा, अशी विनंती करत अजित पाटील यांनी पुणे येथील प्रादेशिक कार्यालयात अनेकदा अर्ज केले होते. बुधवारी २१ डिसेंबर रोजी रात्री एका साखर कारखानदाराकडून कारवाई न करण्यासाठी व लायसन्सचे नूतनीकरण करण्यासाठी सात रस्ता परिसरात दोन लाख रुपये घेताना एसीबीच्या जाळ्यात सापडले.
