उज्जैन – येथे दर्शनासाठी गेलेल्या भाविकांना धुळे तालुक्यातील आर्वी शिवारात शस्त्राचा धाक दाखवत धाडसी दरोडा टाकण्यात आला. इंदोर येथून पुण्याकडे जात असलेल्या तीन ते चार इसम धुळे तालुक्यातील आर्वी जवळ काल रात्रीच्या वेळी रस्त्याच्या कडेला गाडी लावून विश्रांती घेत होते, या ठिकाणी आलेल्या काही अज्ञात दरोडेखोरांनी गाडीवर दगडफेक केली यात गाडीचा पुढील काच फुटून २ जण गंभीर जखमी झाले आहेत.
तसेच यावेळी दरोडेखोरांनी या गाडीत झोपलेल्या लोकांना शस्त्राचा धाक दाखवून त्यांच्या जवळील रोख रक्कम आणि मोबाईल तसेच त्यांच्या जवळील बॅगा नेल्या आहेत. यावेळी गस्तीवर असलेल्या पोलिसांना माहिती मिळताच धुळे तालुका पोलिसांनी घटनास्थळी धाव घेत दरोडेखोरांना शोधण्याचा प्रयत्न केला, मात्र रात्रीच्या अंधाराचा फायदा घेत दरोळेखोर पळून जाण्यात यशस्वी झाले आहेत. याप्रकरणी धुळे तालुका पोलीस ठाण्यात गुन्हा दाखल करण्यात आला आहे.
विशेष म्हणजे यावेळी धुळे तालुका पोलीस ठाण्याचे पथक रात्रीच्या वेळी गस्तीवर असताना दरोडेखोरांनी हा डाव साधल्याने एकच खळबळ उडाली आहे, गेल्या काही दिवसांपूर्वी अशाच पद्धतीने फागणे गावाजवळ चोरट्यांनी रात्रीच्या वेळी एटीएम फोडण्याचा प्रयत्न केला होता, रात्रीच्या वेळी महामार्गावर होणाऱ्या गुन्ह्यांमध्ये काही प्रमाणात वाढ झाली असून पोलिसांची गस्त वाढविण्याची मागणी नागरिकांकडून व्यक्त होत आहे.
