कोल्हापूर – विद्यार्थ्यांच्या पदवी अभ्याक्रमापासूनच संशोधनाला प्रारंभ व्हायला हवा. विद्यार्थ्यांनी विज्ञान, तंत्रज्ञान याला संशोधनाची जोड देऊन भविष्यातील जागतिक आव्हानांना सामोरे जाणे गरजेचे आहे. भविष्यात भारताला नोबेल पारितोषिक मिळवून देतील असे सक्षम संशोधक या विद्यापीठामार्फत घडवू असे प्रतिपादन कुलगुरू डॉ.के प्रथापन यांनी केले.
डी. वाय. पाटील कृषी व तंत्र विद्यापीठाच्या एमएस्सी रसायनशास्त्र विभागामार्फत आयोजित “केम फ्युजन” या सायन्स क्लबच्या उदघाटन प्रसंगी ते बोलत होते. कुलगुरु प्रा.डॉ के. प्रथापन व कुलसचिव डॉ जे. ए. खोत यांच्या हस्ते या सायन्स क्लबचे उदघाटन झाले. यावेळी असोसिएट डीन डॉ गुरुनाथ मोटे व डॉ.जयंत घाडगे, डॉ. तानाजी भोसले, डॉ. संदीप वाटेगावकर व सर्व विद्यार्थी उपस्थित होते.
प्रसिद्ध शास्त्रज्ञ डॉ. फ्रेंझ हेबर व डॉ. आल्फ्रेड व्हर्नर यांच्या जयंतीचे औचित्य साधून या क्लब ची स्थापना करण्यात आली. यानिमित्त विद्यार्थ्यांनी रसायनशास्त्राशी निगडित विविध केमिकल मॉडेल्स, आवर्त सारणी, अणू व रेणू अभिक्रिया, शास्त्रज्ञांची माहितीपूर्ण भित्तीपत्रके यांचे प्रभावी सादरीकरण केले.
कुलसचिव डॉ जे.ए. खोत म्हणाले “सायन्स क्लबच्या माध्यमातून विद्यार्थ्यांना राष्ट्रीय व आंतरराष्ट्रीय स्तरावर प्रतिनिधित्व करण्यासाठी एक व्यासपीठ मिळाले आहे. यामाध्यमातून भविष्यात विविध कार्यक्रम, कार्यशाळा, सेमिनार व परिषदा आयोजित करून विद्यार्थ्यांच्या अंगी असणाऱ्या कलागुणांना वाव दिला जाईल. यासाठी प्रशासनामार्फत जी मदत लागेल ती पुरवू असे आश्वासन दिले.
प्रास्ताविकात डॉ गुरुनाथ मोटे यांनी विद्यार्थ्यांच्या अंगी वैज्ञानिक अभिवृत्ती निर्माण व्हावी हा या क्लबचा मुख्य उद्देश असल्याचे सांगितले. डॉ. तानाजी भोसले व डॉ. संदीप वाटेगावकर यांनीही मनोगत व्यक्त केले. अंकिता गुरव, मयुरी आटपाडकर व प्रथमेश पाटील यांनी सूत्रसंचालन केले तर आभार प्रदर्शन पूजा पवार व ऐश्वर्या चव्हाण यांनी केले. या कार्यक्रमाचे आयोजन करण्यासाठी विद्यार्थी समन्वयक तुषार पाटील व शर्वरी पाटील यांच्यासोबत सर्व विद्यार्थ्यांनी अथक परिश्रम घेतले.
कुलपती डॉ. संजय डी. पाटील, संस्थेचे उपाध्यक्ष माजी गृहराज्यमंत्री आमदार सतेज उर्फ बंटी डी. पाटील, विश्वस्त आमदार ऋतुराज पाटील, कार्यकारी संचालक डॉ. ए. के. गुप्ता यांचे मार्गदर्शन लाभले.
