गडचिरोली – जिल्ह्यात बहुप्रतिक्षित असलेल्या आणि तमाम सुशिक्षित बेरोजगारांचे लक्ष लागलेल्या पोलीस शिपाई व चालक पदाची भरती प्रक्रिया नवीन वर्षाच्या दुसऱ्याच्या दिवशी म्हणजे दोन जानेवारीपासून सुरू होत आहे. शारीरिक क्षमता चाचणीने या प्रक्रियेला सुरुवात होणार आहे. विशेष म्हणजे यावेळी पहिल्यांदाच त्यासाठी शंभर टक्के तंत्रज्ञानाचा वापर केला जाणार आहे. भरती प्रक्रिया अचूक आणि पारदर्शीपणे व्हावी यासाठी हे तंत्रज्ञान वापरले जात असल्याचे पोलीस प्रशासनाकडून स्पष्ट करण्यात आले.
राज्यातील संपूर्ण जिल्ह्यासाठी १४ हजार जागांची पोलीस भरती होत आहे. यात गडचिरोली पोलीस दलासाठी ३४८ पोलीस शिपाई आणि १६० चालक पोलीस शिपाई पदांची भरती प्रक्रिया होत आहे. यावर्षीच्या भरतीत बायोमेट्रिक पद्धतीने उमेदवारांची नोंदणी, इलेक्ट्रॉनिक आधारित उंची व छातीचे मोजमाप, आरएफआयडी आधारित १६०० मीटर व १०० मिटर धावणे आणि इन्फ्रारेड (IR) तंत्रज्ञानाचा वापर करून गोळा फेकीच्या लांबीचे मोजमाप केले जाणार आहे.
दिनांक २ ते ४ जानेवारीपर्यंत चालक पदासाठी पुरुष उमेदवारांची शारीरिक चाचणी तर ५ जानेवारीला महिला उमेदवारांची शारीरिक क्षमता चाचणी होणार आहे. सोबतच दिनांक सहा ते १४ जानेवारी २०२३ पर्यंत पोलीस शिपाई पदासाठी पुरुष उमेदवारांची शारीरिक चाचणी होणार असून शेवटचे तीन दिवस म्हणजे दिनांक १५ ते १७ जानेवारी पर्यंत पोलीस शिपाई पदासाठी महिला उमेदवारांची शारीरिक क्षमता चाचणी होणार आहे. रविवारचा दिवस वगळून ही चाचणी होणार असल्याचे पोलीस विभागाकडून सांगण्यात आले.
५०८ जागांसाठी २५ हजारांवर अर्ज
पोलीस शिपाई पदाच्या ३४८ जागांसाठी १९,९०३ अर्ज आले आहेत. त्यात पुरुष १४,६७८ आणि महिला ५२२५ आहेत. तसेच चालक पोलीस शिपाई पदाकरिता एकूण ५५८१ अर्ज आले आहेत. त्यामध्ये पुरुष पाच हजार ३१६ तर महिला २६५ आहेत. एकूण ५०८ जागांसाठी २५,४८४ अर्ज आहेत. त्यावरून अर्ज करणाऱ्यांची संख्या एका जागेसाठी ५० जण अशी सरासरी आहे.
प्रलोभनाला बळी पडू नका. पोलीस अधीक्षकांचे आवाहन
अर्ज करणाऱ्यांचे प्रवेश पत्र policerecruit२०२२.mahait.org या वेबसाईटवर जाऊन संबंधित उमेदवारांना डाऊनलोड करता येतात. तसेच प्रवेश पत्रावर नमूद असलेल्या शारीरिक चाचणीची तारीख लक्षात घेऊन भरती प्रक्रियेसाठी लागणाऱ्या अत्यावश्यक कागदपत्रांची उपस्थित रहावे. उमेदवारांनी कुठल्याही प्रलोभनाला किंवा आमिषाला बळी पडू नये कोणी आम्ही किंवा प्रलोभन देत असेल तर पोलीस अधीक्षक कार्यालय, गडचिरोली येथील समाधान कक्ष, दूरध्वनी क्रमांक ८८०६३१२१०० किंवा जवळच्या पोलीस स्टेशनला कळवावे असे आवाहन पोलीस अधीक्षक निलोत्पल यांनी केले आहे.
