पिंपरी – अनैतिक संबंधास अडथळा ठरणाऱ्या मैत्रिणीचे अपहरण करून हत्या करणाऱ्या आरोपीला चौदा वर्षानंतर पकडण्यात यश आले आहे. भोसरी पोलिस स्टेशनला गुन्हा दाखल झाल्यापासून हा आरोपी पोलिसांना गुंगारा देत होता. अप्पा गोगाजी मोहिते ( वय ५०) याला पोलिसांनी अटक केली आहे.
याबाबत पोलिसांनी दिलेली माहिती अशी की, आरोपी अप्पा गोगाजि मोहिते हा भोसरी एमआयडीसी परिसरात असणाऱ्या प्रकाश चव्हाण गँगचा सक्रिय सदस्य आहे. भोसरी परिसरात रहात असताना एका महिलेशी त्याचे अनैतिक संबंध होते. मात्र या संबंधात तिची मैत्रीण अडथळा ठरत होती. अखेर आरोपीने तिचे पिंपरी येथून अपहरण केले. तिला त्याच्याच घरात ठेवून तिची निर्घृण पने हत्या केली. हत्येनंतर त्याच्यावर भोसरी पोलिस ठाण्यात गुन्हा दाखल करण्यात आला होता. तो अनेक ठिकाणी नाव आणि पत्ता बदलून रहात होता. गेल्या १४ वर्षांपासून तो पोलिसांना गुंगारा देत होता. तसेच त्याचा कोणताही फोटो पोलिसांकडे नसल्याने जुन्या फोटोवरून त्याला ओळखणे अवघड होते.
पोलिसांनी तपास वेगळ्या पद्धतीने त्यात १५ वर्षांपासूनचे सह आरोपी आणि चव्हाण गँगच्या माध्यमातून पोलिसांनी तपास करण्याचे ठरवले तपास करत असताना तो खेड तालुक्यातील वाकी येथे राहत असून चाकण एमआयडीसी येथे मजुरीचे काम करत असून लवकरच तो औरंगाबाद येथे जाणार असल्याची माहिती पोलिसांना मिळाली, त्यानुसार पोलिसांनी सापळा रचत त्याला अटक केली. माझ्या अनैतिक संबंधात अडथळा ठरत असलेल्या मैत्रीचे अपहरण करून तिचा खून केल्याचे त्याने कबूल केले आहे. या प्रकरणी अधिक तपास पोलीस करत आहेत.
