रत्नागिरी – दापोली मंडणगडचे आमदार योगेश कदम यांच्या गाडीला झालेला अपघात हा घातपाताचा कट असल्याचा आरोप रामदास कदम यांनी केला आहे. हा अपघात होता की घातपात होता, असा संशय रामदास कदम यांनी व्यक्त केला. गृह विभाग माझ्याकडेही होता. मलाही काही गोष्टी कळतात. पुढे मागे पोलीस गाडी असताना योगेश कदम यांच्या गाडीला डंपरनं कशी धडक दिली, असा सवाल रामदास कदम यांनी केला आहे.
योगेश कदम यांच्या कारला झालेला अपघात हा घातपत करण्याचा कट असल्याचा संशय रामदास कदम यांनी व्यक्त केला आहे. मातोश्रीच्या आशीर्वादाने अनिल परब यांच्याकडून योगेश कदम यांना राजकारणातून संपवण्यासाठी प्रयत्न केला गेला होता मात्र तो सफल झाला नाही. म्हणूनच हा घातपाताचा कट रचला नाही ना ? असा संशय रामदास कदम यांनी व्यक्त केला आहे.
माझा संशय यांनी यापूर्वी ज्यांनी योगेश कदमला संपवण्याचा प्रयत्न केला होता, अनिल परब सारख्या लोकांनी मातोश्रीच्या आशीर्वादानं प्रयत्न झाला होता. दापोली मंडणगडचे लोक योगेश कदमच्या पाठिशी उभे राहिले, असं रामदास कदम म्हणाले.
रामदास कदम यांनी योगेश कदम यांच्या अपघातासंदर्भात मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याशी बोलणार असल्याचं सांगितलं. आमदारांच्या गाडीला पुढे मागे पोलीस संरक्षण असून देखील बरोबर मधल्या गाडीला डंपरनं कसा धक्का दिला. एखादा डंपर मागून येऊन मधल्या गाडीला धक्का देतो, १५० फूट फरफटत नेतो, थोडं जर चुकलं असतं तरी ती गाडी दरीत कोसळणार होती, कुठलेही चान्सेस नव्हते. योग्य नियोजनाद्वारे हे घडलंय का? असा सवाल रामदास कदम यांनी केला.
रायगडच्या पोलीस अधिकाऱ्यांशी बोललो आहे. योगेश कदम यांना आयुष्यातून उठवायचा डाव होता की काय असा संशय असल्याचं रामदास कदम म्हणाले. ज्येष्ठ पोलीस अधिकाऱ्याच्यावतीनं या संपूर्ण प्रकाराची चौकशी व्हावी. हा योगेश कदम यांचा घातपात करण्याचा संशय होता, असं रामदास कदम म्हणाले. मातोश्रीच्या आशीर्वादानं अनिल परब सारखे लोक असं करतात का, असा संशय माझ्या मनात असल्याचं रामदास कदम म्हणाले.
